Valmistautumista Swim the Arctic Circle -avovesiuinnin 3000 metrin yöuintiin.

”Sole poka mikhään” on perin tuttu tokasu täälä Tornionjokilaaksossa Ruottin rajala. Mie laitoin tuon tuohon alkhuun tuohmaan ittele vähän niinko tsemppiä tähän kirjottamisheen murtheela. Saa nähä, kuinka tässä käy, taijan pyytää Ailalta apua.

Mie aattelin kertoa teile kylästä nimelthään Juoksenki, joka sijaittee Napapiirilä, kommeitten vaaramaisemien ympäröimänä. Euroopan pisin vaphaana virtaava rajajoki, Tornionjoki, erottaa meät täälä asuvat kuningaskunta Ruottista ja kylästä nimeltä Juoksengi.

Nämä kaks kyllää olit yks sama kylä aina vuotheen 1809 saakka, jolloin Ruottin ja Venäjän raja veethiin Haminan rauhassa Tornionjokheen. Paljon meän kylilä on sukua elikkä släktiä, niinko Ruottin puolella sanothaan, kumminkin puolin Väylää, joksi jokea myös meän perälä kututhaan. Täälä kuulee praatattavan ruottia, suomea ja meän kieltä, jossoon sanoja sekä ruottin että suomen kielestä. Miepä laitan tähän esimerkin selventämhään asiaa:

”Se ookasi papan biiliä toistasattaa glasissa.”

Yhteistyötä met tehemä ruottalaisten kans monessaki projektissa. Talvela met jääytämmä autolla ajettavan jäätien, joka lyhentää matkaa Juoksenkien välillä 60 kilometriä. Jos sitä ei ois, met joutusimma kierthään joko Pellon tai Aavasaksan siltojen kautta. Kesälä met tietty pääsemä venheilä yli Väylän, jos haluama käyä Ruottin puolela olevassa lähikaupassa.

Uuen vuen met vastaanotama kaks kertaa tuossa Tornionjoen jäälä, sitä kututhaan englanniksi ”We do it Twice”-tapahtumaksi, ko sielä on ylheensä ulkomaalaisia turistia matkassa ihmettelemässä tätä meän maailman rauhalisinta raijaa ja ammuthaanhan sielä raketikki kahteen kerthaan. Soon Ruottissa aika tunnin vähemän ko Suomessa, joten met pruukaama hyöyntää näitä kahen maan erilaisuuksia tapahtumissa.

Heinäkuussa järjestethään yhessä avovesiuintikilpailu nimelthään ”Swim the Arctic Circle”. Siinä uihaan lauantaina 15.7.2017 päivälä 2000 metrin matka ja yöuintina 3000 metriä, joka lähtee sunnuntaina 16.7. klo 00.05 Suomen puolelta. Uiessa ylitethään tasavallan ja kuningaskunnan raja, napapiirin raja sekä aikavyöhyke eli uihaan ajassa taaksepäin, koska noppeimat oon maalissa Ruottin puolela lauantaina klo 23.30. Uinissa on ollu mukana tosi kansainvälistä porukkaa ympäri maailman aina Amerikasta ja Uuesta-Seelannista asti.

Heinäkuussa 22.-23.7.2017 Kattilakoskella järjestethään SM-tason tukkilaiskisat kylän seurojen Napapiirin Erän, kyläyhistyksen ja kalastuskunnan kans. Katttilakoski on yksi Tornionjoen kauhneimmista paikoista, joten sinne kyllä kannattaa tulla kauempaaki  kattomhaan, kuinka tukila laskethaan kosken kuohuissa tai sauvothaan venheellä vastavirthaan. Siihen ei nykyhään ennää kovin moni pystykhään.

Onhan täälä tietty vielä toukokuun lopulla vetouistelukisat Ratasjärvelä, joka on seki juuri komea paikka. Oohan se oikein valtakunnallisesti merkitty sekä kulttuurellisesti että maisemallisesti arvokhaaksi aluheeksi. Talvela sielä piethään sitte, ylheensä maaliskuussa, pilkkikilpailut.

 

Juoksengissa tapahtuu monenlaista, usein myös yli valtion rajan.

Valtatie 21 mennee Juoksengin läpi, ja sitä kautta kulkeville matkailijoille kylässä on pariki tasokasta pysähyspaikkaa: Tuomaan Tupa Napapiirillä ja siitä 5 kilometriä pohjosheen Pörröporo. Kummastaki saa sapuskaa, kahvia ja nisuja, sekä matkamuistoja ja elintarvikheita.

Yöpyjiä palvelee lähinä kesäaikhaan uusittu leirintäalue Arctic Camping, josta oon mahollisuus vuokrata venheitä lohenkalastukseen. Tornionjokeahan nousee vastavirthaan lohia oikein urakalla, ja niitten hyppyjä on juuri soma kattoa, ko ne pyrkii kohti pohjoista. Toinen leirintäalue Tonko sijaittee Kattilakosken parthaala, jossa lohenkalastus tapahtuu lähinä rannalta virvelöimällä.

Outakaira Tuottamhaan ry:n hankheesta ”Meän kimpsut ja kampsut” met olema saahneet rahotusta näihin kylän tapahtumiin mm. popup-telttojen ja mainosmateriaalin hankinthaan. Muutenki pruukathaan osallistua erilaishiin Outokairan järjestämhiin projekteihin ja tillaisuuksiin. Niistä saa aina hyvin ideoita ja apua tänne kylälekki.

Juoksengissa on hyät mahollisuuet kalastukseen, mettästykseen, marjastukseen tai muuten vain luonon ja maisemien ihhaihluun.

Met toivotamma teät tervetulheiksi tänne Juoksenkhiin Napapiirile Ruottin rajale. Käykää kattomassa kylän facebook-sivua, sieltä näettä kuvia, tapahtumia yms.

Teksti:
Anne Syväniemi-Kuitunen

Kuvat:
Emil Wikström, Leena Ruosteinen, Elina Kuitunen

Pin It on Pinterest